AZƏRBAYCAN RESPUBLİKASININ İLK ELEKTRON ENSİKLOPEDİYASI
17 Mart

Hansı oyunlar azartlı (qumar) oyunlar adlandırılır?

Bu məqaləni qiymətləndir
(0 səs)

Əzəldən insanlarda oyunlarla məşğul olmaq, oyunlarla vaxt keçirmək xüsusiyyəti var.

İnsanlar bəzən asudə vaxtlarını oyunlara həsr edir, oyunlar vasitəsilə bu aləmi anlayır və bir şəxsiyyət kimi məşhurlaşır.

Bir çox oyunlar azartlı oyunlar və ya qumar adlandırılır. Azartlı oyunlar dedikdə, istər-istəməz, iki və ya daha çox adamların iştirakı ilə oyun alətlərindən istifadə etməklə baş verən təsadüfi hallarla bir-birinə qarşı oynaması düşünülür.

“Azartlı oyunlar” termini fransız terminidir ki, bu da tərcümədə “təsadüflər oyunu” mənasını verir.
Azartlı (qumar) oyunlarda – oyun kartlarından (poker, bakkara, 21, və s.), oyun zərlərindən, oyun avtomatlarından, elektron emulyatorlardan və s. istifadə olunur.

Azartlı oyunların nəzəri əsasları

Azartlı oyunların əsas qanunu- udmaq və ya uduzmaq!

Azartlı oyunlar zamanı baş verəcək bir çox halları (kartların və ya zərlərin kombinasiyası, kürəciyin ruletkanın hansı bölməsinə düşməsi, oyun aparatlarında simvolların kombinasiyası və s...) öncədən ehtimal etmək və ya riyazi hesablamalar vasitəsilə təxmin etmək mümkündür.

Azartlı oyunların həvəskarlarının əksəriyyəti udmaq şansının az olduğunu bilirlər və buna baxmayaraq, oyunçular udmaq ümidilə risk edirlər.

Azartlı oyunların tarixçəsi

Azartlı oyunlar insanlara qədim dövrlərdən məlumdur. Bu cür oyunlar Qədim Vavilonda, Qədim Hindistanda, Qədim Yunanıstanda və Romada oynanılmışdır.

Azartlı oyunlar bütün qədim sivilizasiyalar zamanı məlum olmuşdur. Buna səbəb insan naturasının özünəməxsus psixoloji durumu olmuşdur. Qədim zamanlarda insanlar zər oyunları və pulla mərc oyunları oynayardılar.

İlk qumarxanalar (azartlı oyunlar evi) İtaliyada XII əsrdə yaradılmışdır. Sonralar isə digər Avropa ölkələrində də qumarxanalar yaradılmağa başlamışdır, əsasən də Almaniya, İngiltərə və Fransada. XIII Lüdoviqdən başlamış, bütün fransız monarxlarının və bir çox məşhur saray adamlarının azartlı oyunlar aludəçisi olması tarixi sənədlərə həkk olunmuşdur.

XIX əsrdən başlayaraq çar Rusiyasında da qumarxanalar, klublar və kazinolar yaradılmağa başladı. Bu cür kazinolara gələnlər bəzi prinsiplərə əsasən, bir neçə hissələrə bölünürdü. Kompüterin icadı və İnternetin yaranması insanlarda azartlı oyunlar haqqında olan təsəvvürü tamamilə dəyişdi.

Azartlı oyunlara münasibət

Əksər ölkələrin qanunvericiliyində azartlı oyunların daha çox yayılmasının qarşısını alan müddəa və maddələr mövcuddur. Azartlı oyunların  və oyun evlərinin çox yayılmamasına xüsusi nəzarət edilir və qanunlarla tənzimlənir. Qanunu pozanlar müxtəlif formada cəzalandırılır və hətta, cinayətə də cəlb olunurlar.

Ümumi qaydalara əsasən, azyaşlıların, həddi-buluğa çatmayanların azartlı oyunlarda istirakı qəti qadağandır.

Kriminaloji araşdırmalar sübut etmişdir ki, azartlı oyunlara aludəçilik və asılılıq, belə oyunlara həvəsin artması, qumarxanaların artması, əksər hallarda insanları müxtəlif cinayətlərə (oğurluq, rüşvətxorluq, korrupsiya, əmtəə yeyintisi və mənimsənilməsi, çirkli pulların yuyulması və ya leqallaşdırılması, vergidən yayınma, hətta iqtisadi cinayətlər) sürükləyir.

Amma yuxarıda sadaladıqlarımızın tam əksinə olaraq, bəzi ölkələrin məhkəmə strukturları azartlı oyunların bir çoxuna idman növü kimi xüsusi statuslar veriblər. Məsələn: Nyu-Yorkun Federal Məhkəməsinin qərarına əsasən, “Poker” adlı azartlı kart oyunu heç də qumar deyil, bir idman növüdür”. Bu kart oyununda təsadüfi bəxtin gətirməsi yox, oyunçuların ustalığı əsas rol oynayır.

AzEns.az

 

Oxu 1737 dəfə

Şərh verin.

Comments.