AZƏRBAYCAN RESPUBLİKASININ İLK ELEKTRON ENSİKLOPEDİYASI
27 İyul

«Ramazan» kəliməsinin sirri

Bu məqaləni qiymətləndir
(8 səs)

 Ramazan Ərəbcə bir sözdür. Qəməri aylardan doqquzuncusunun adıdır. Ramazan sözünün mənası və bu mübarək aya Ramazan adının verilməsindəki hikmət belə ifadə edilmişdir:

1.Yazın sonu payız mövsümünün əvvəlində yağıb yeri tozdan təmizləyən yağış mənasına gələn "ramda" sözündən alınmışdır. Bu yağış ümumiyyətlə yer üzünü təmizləyir. Bunun kimi ramazan da möminləri günahlarından təmizləyir, ürəklərini pak edir.

2. Digər bir izaha görə, günəşin şiddətli hərarətindən daşların yanıb qızması mənasına olan "ramad" sözündən alınmışdır. Belə qızğın yerdə gedən kimsənin ayaqları yanar. Bunun kimi oruc tutan kimsə də aclıq və susuzluğun hərarətinə dözür. Yaxud qızğın yer ayaqları yandırdığı kimi Ramazan da möminlərin günahlarını yandırır, yox edir.

3. Bir hədis-i şərifdə "Ramazan"ın Allahın adlarından olduğu ifadə edilmişdir.

   Ramazan ayı rəhmət və bağışlama ayıdır. Bu ayda mələklər yerə enər, oruc tutanlara güc və dözüm verərlər. Ramazan ayı Quranın doğulduğu aydır. Bayramın tarixi müsəlman təqvimi ilə hicrinin 2-ci ilindən (miladi 623-cü il) başlanır. Oruc Ramazan ayında tutulduğu üçün ona «Ramazan orucu» da deyirlər.

   İslamda ilin ayları arasında Ramazan ayı ən müqəddəs ay hesab edilir. Onu məcazi şəkildə «on bir ayın sultanı» da adlandırırlar, çünki bu ayın gecələrinin birində Quran`i-Kərim nazil olub. Min aydan daha xeyirli olduğu şəxsən  Quran tərəfindən bəyan edilən QƏDR GECƏSİ də bu aydadır.

   Ramazan biz möminlər üçün eyni zamanda bir aylıq həyat kursu deməkdir. Bu bir ayda ac qalmağı, acın halından anlamağı öyrənirik. Kasıbla zənginliyimizi paylaşmağı, köməkləşməyi öyrənirik. Yalnız mədəmizə deyil, bütün bədən üzvlərimizə oruc tutmağı öyrədirik. Çünki Oruc yalnız mədənin iştirak etdiyi bir ibadət deyil. Bütün orqanların ortaq şəkildə və eyni anda iştirakıyla reallaşan bir ibadətdir. Oruc insanın bədən hüceyrələrini yeniləməklə onun həyatını təzələyir. Həmçinin zərərli hüceyrələr bədəndən ifraz edilir, mədə və həzm orqanları rahatlanır. Yemək və içməyin tərk etdiyi artıq turşular, qidalar və qalıqlar hamısı ifraz edilir. 

  Orucun ən yüngül tərəfi yemək və içməyi tərk etməkdir. Keçmiş alimlər oruc tutduqlarında məscidlərdə otururdular, bunun səbəbini soruşanda belə deyirlər: “Orucumuzu qoruyuruq”. Bu ayda Rəblərinə ibadətdə ciddi olanlar məscidlərə möhkəm sarılar, camaatla birlikdə gecə və gündüz namazları qılar, qonşularına, qohumlarına, ehtiyacı olanlara imkanları daxilində yardım edər, iftar verərdilər. Peyğəmbər (Allahın salavatı və salamı onun üzərinə olsun) buyurub: “Bir orucluya iftar verən oruc tutmuş kimi savab qazanır. (Tirmizi)

   Ramazan bayramı Azərbaycanda Milli Məclisin 1992-ci il 27 oktyabrda qəbul etdiyi qanunla qeyd olunmağa başlayıb.

 

                                                                Allah Orucumuzu qəbul etsin...... Amin!

 

Oxu 103286 dəfə

Şərh verin.

Comments.